agg

A Asociación de Gaiteir@s Galeg@s organiza o vindeiro sábado 24 de outubro unha nova edición das Xornadas arredor da música tradicional, unha cita xa consolidada no calendario cultural galego que acada este ano a súa décimo terceira edición. A actividade, desenvolvida en colaboración coa Área de Cultura da Deputación de Pontevedra, terá lugar na Casa da Gaita, en Viascón (Cerdedo-Cotobade).

A Asociación de Gaiteiros e Gaiteiras Galegas (AGG), co apoio da área de Cultura do Concello de Lugo, celebra este domingo 11 de outubro a XXVIII Mostra de Música Tradicional do Domingo das Mozas, unha das citas máis emblemáticas das festas do San Froilán e a única mostra deste tipo que se realiza en festas patronais en toda Galicia.

Durante os días 1 e 2 de agosto, no corazón da Feira e Festa da Música e da Arte que é o Festival de Pardiñas, a Mostra de Instrumentos de Música Tradicional celebra a súa 33ª edición, consolidada como un dos encontros de referencia para a artesanía musical galega e para a divulgación da nosa cultura de raíz. 

A cidade de Pontevedra acollerá os días 10, 11 e 12 de xullo a XXVII edición do Memorial Ricardo Portela, unha das citas máis emblemáticas da música tradicional galega. A Praza da Ferraría converterase, durante tres xornadas, nun espazo de encontro para artesáns, agrupacións de música e baile tradicional e público de todas as idades, cunha programación que combina concertos, homenaxes e pasarrúas polas rúas e prazas do centro histórico.

Nesta ocasión, o encontro renderá homenaxe a José Fernández Canosa, coñecido como “O Ghaiteiro do Piñeiro”, figura fundamental na transmisión das tradicións de Aldán, especialmente da danza e dos Reis de Aldán, que mantivo vivas ao longo de case medio século de actividade musical.

O primeiro fin de semana de agosto volverá traer a Pardiñas ese latexo único que só alí se sente: o encontro entre a música, a artesanía e a memoria viva dun pobo. Os días 1 e 2 de agosto, no corazón do Festival de Pardiñas, celebrarase a 33ª Mostra de Instrumentos de Música Tradicional, unha cita xa mítica organizada pola Asociación de Gaiteiros e Gaiteiras Galegas. Trátase dun dos encontros culturais máis singulares e agardados do país que reune artesanía, música e patrimonio e que leva máis de tres décadas xuntando a artesáns, intérpretes, investigadores e público de todas as idades.

A AGG e Cántigas da Terra en colaboración coa Asociación Entroido de Samede e a Deputación de A Coruña organizamos o vindeiro 19 de abril unhas Xornadas de frauta. 

A Asociación de Gaiteiros e Gaiteiras Galegas (AGG), xunto coa área de Cultura da Deputación de Lugo e o Concello de Folgoso do Courel, organiza o vindeiro sábado 25 de abril, a cuarta edición das Xornadas de Carballesa, que terá lugar en Seceda do Courel.

Achégase unha das nosas citas imprescindibles do ano, o Memorial Henrique Otero, na que un ano máis xuntarémonos para honrar e recoñecer o compromiso do Gaiteiro do Fragoso coa música tradicional.

Desde a AGG e a Fundación Rosalía organizamos de novo para o 23 de febreiro (Día de Rosalía) a Alborada para Rosalía de Castro!!

O vindeiro martes 10 de febreiro celebrarase unha xornada especial dedicada ao Entroido tradicional, organizada pola Tradescola en colaboración coa Área de Educación do Concello de Lugo. A iniciativa está dirixida ás ANPAS de todos os centros de educación primaria do municipio e concíbese como unha actividade aberta ao público familiar, pensada para vivir e compartir o Entroido desde a creación, o ritmo e o movemento.