A AGG organiza unha nova edición de “A Memoria das Avoas”, un encontro que homenaxea e pon en valor o papel das mulleres na transmisión da nosa cultura tradicional
A Asociación de Gaiteiras Galegas (AGG) celebrará o vindeiro sábado 21 de novembro unha nova edición de “A Memoria das Avoas. Creadoras e transmisoras da nosa cultura popular”, unha iniciativa que busca recoñecer e visibilizar o papel fundamental das mulleres na conservación e transmisión da tradición oral, musical e do baile tradicional de Galicia.
O evento celebrarase na Casa da Cultura de Berdeogas e contará coa participación das informantes de Berdeogas e Berdoias, as Pandeireteiras As de Buxantes e Traspés Pandeireteiras nun acto guiado por Alejandro Martínez.
Tras a súa primeira edición, impulsada no marco das Letras Galegas dedicadas ás cantareiras e á poesía popular oral, a AGG dá continuidade a este proxecto coa vontade de manter vivo o recoñecemento ás mulleres que, xeración tras xeración, gardaron na súa memoria un valiosísimo patrimonio cultural composto por cantigas, romances, bailes, melodías, historias e saberes tradicionais.
A xornada terá lugar na Casa da Cultura de Berdeogas e estará centrada nesta ocasión nas informantes e portadoras da tradición oral das parroquias de Berdeogas (Dumbría) e Berdoias (Vimianzo), protagonistas dunha homenaxe pública que pretende agradecer a súa xenerosa contribución á conservación do noso patrimonio inmaterial.
O programa incluirá unha charla-homenaxe coas informantes de Berdeogas e Berdoias, representadas nas figuras de:
- María Núñez Agulleiro
- María Gloria Fernandez Esparís
- Divina Pereira Núñez
- Julia Barrientos Lema
- Pura Agrafojo Castiñeira
- Maricarmen Agrafojo Castiñeira
- Alejandro Pérez Rodríguez
- María Pérez Caamaño
- María Estrella Espasandín García.
Un espazo de encontro e memoria no que compartir experiencias, lembranzas e testemuños arredor da transmisión da música e do baile tradicionais. O acto estará acompañado por diversas actuacións musicais, coa participación das Pandeireteiras de Berdeogas e Berdoias, así como dos grupos As de Buxantes e Traspes Pandeireteiras, que achegarán ao público un repertorio representativo da riqueza da tradición oral da comarca.
Desde a AGG destacamos que esta iniciativa nace da necesidade de seguir poñendo nome e apelidos a tantas mulleres que, malia seren figuras esenciais para a conservación da nosa cultura popular, permaneceron durante décadas nun segundo plano. Fronte ao anonimato co que frecuentemente se identificou ás cantareiras, pandeireteiras e bailadoras, “A Memoria das Avoas” pretende recoñecer o seu papel como auténticas creadoras, depositarias e transmisoras do saber tradicional galego.
O encontro constitúe tamén un espazo de diálogo interxeracional no que se unen memoria, música e comunidade, favorecendo o intercambio de coñecementos entre distintas xeracións e reforzando a ligazón entre a sociedade actual e o patrimonio cultural herdado.
Con esta actividade, a Asociación de Gaiteiras Galegas reafirma o seu compromiso coa defensa, estudo, conservación e divulgación da cultura tradicional galega, ao tempo que continúa avanzando na necesaria visibilización das mulleres que fixeron posible a súa supervivencia ata os nosos días.
A actividade que está organizada pola Asociación de Gaiteiros e Gaiteiras Galegas, coa colaboración do Concello de Dumbría e o apoio da Deputación da Coruña, será de balde ata completar o aforo.
Máis información: secretaria@gaiteirosgalegos.gal / 986 847 074 e 982 229 966.