A transmisión do fogo na sección Porfiamos do Sermos Galiza
O pasado 20 de marzo saía publicado un novo artigo da serie porfiamos no Sermos Galiza do Nós Diario, a sección coa que colabora a AGG mensualmente e que nesta ocasión escribiu o noso directivo Pedro Magariños.
No artigo, que se pode ler completo no Nós Diario, o noso compañeiro Pedro reivindica a tradición oral como un ser vivo en constante movemento. As cantigas viaxan polo tempo e polo territorio, transformándose sen perder a súa esencia grazas a quen as escoita, as interpreta e as transmite.
A través de exemplos musicais —como as versións de Xosé Valiñas que fai propias melodías escoitadas ao azar— sublíñase que a autenticidade non depende da copia literal, senón da fidelidade ao espírito da peza. Fronte á idea de conservar o saber como algo fixo e inmóbil, defénde unha visión dinámica: a tradición é un facho aceso, non unhas cinzas que adorar.
"Nun regato ou nunha fonte, se pechas os ollos, podes oír a voz da señora Carmen de Campos, que nos canta alén do tempo".
O texto lembra que “tradición” significa precisamente “entrega”, e que só pode sobrevivir mediante un traballo colectivo, diverso e participativo. Por iso conclúe cun chamamento a defender proxectos comunitarios de todo tipo, que manteñan vivo ese lume que pasa de xeración en xeración.