A Tradescola enche de música e baile tradicionais o MIHL (Museo Interactivo da Historia de Lugo)
A Tradescola celebra o vindeiro mércores 25 de marzo os Sons de marzo, a actividade para compartir co público o traballo que o alumnado desenvolve ao longo do curso. As audicións, que terán lugar nas instalacións do MIHL, reunirán a estudantes de diferentes niveis e especialidades, converténdose nun espazo de encontro, aprendizaxe e celebración da música tradicional galega.
Durante a sesión, o público poderá gozar dunha ampla variedade de interpretacións: desde pezas de gaita, requinta, zanfona, percusión, acordeón, clarinete, canto tradicional e por suposto moito baile, sendo para moitos dos e das participantes a súa primeira experiencia nun escenario, un momento especial para compartir diante das familias, amizades e profesorado o progreso acadado.
- Mércores, 25 de marzo ás 20:30h
- No MIHL (Museo Interactivo da Historia de Lugo), no Parque da Milagrosa (Frigsa)
Con esta edición do Sons de marzo, a Tradescola reafirma unha vez máis o seu compromiso coa difusión da cultura galega e coa creación de espazos onde a aprendizaxe musical se viva de maneira colectiva, participativa e gozosa.