agg

Ponencia que ten como obxectivo afondar no toque porteliano a través das súas gravacións identificando tanto a dixitación como os recursos empregados e propoñer un sistema para a súa representación que contribúa á súa transmisión e uso no ámbito do ensino.

Charla impartida por Óscar Ibáñez no marco da quinta edición das Xornadas arredor da música tradicional organizadas pola AGG o 16 - 9 - 2017

Ricardo Portela Bouzas (Viascón, 1920-Pontevedra, 1992) foi o último dos célebres referentes históricos da tradición gaiteira pontevedresa, que tomando o relevo de Xoán Tilve de Campañó e do Gaiteiro de Soutelo tras o maxisterio Xosé Oliveira Blanco “O Moreno”, simbolizou para as novas xeracións de ámbito urbano fundamentalmente, o nexo coa tradición nun momento clave no que agromaban outros xeitos de tocar e de entender o instrumento. Fiel aos seus ideais realizou unha constante labor reivindicativa a prol da nosa música, da nosa gaita e da figura do gaiteiro e contribuíu decisivamente na recuperación do toque pechado esmorecente na altura. No seu singular toque pechado, semipechado, alternaba a dixitación aberta e a pechada segundo o tema ou a pasaxe a interpretar ao tempo que empregaba abundantes ornamentos e matices expresivos metodicamente desenvolvendo unha estética musical moi persoal coa que acadou unha sonoridade propia e distintiva.

Óscar Ibáñez é mestre en Educación Musical, Especialista Universitario en Música Tradicional Galega, Especialista Universitario en Arquivística, Máster en Xestión da Documentación Musical, Título Profesional de Música na especialidade de gaita e cursou estudos oficiais de frauta de bico